't Zjwamer Mertsjpektakel

In 't kórt...

't Zjwamer Mertsjpektakel is ein aopelóchfestiviteit, die al vanaaf 2006 neet meer weg te dinke is binne de Zjwamer vastelaovindj! De organizasie van 't Mertsjpektakel verzorgt same mit de Zjwamer Mertkasteleins - 't Kesjotje, De Mert, De Geitesjtal en De Plevuus - op vastelaoveszónjig ein fantasties programma mit de crème de la crème oet de Limburgse artiestesjtal. Gein polsbendjes of entree, mer gezelligheid op zien Zjwaams!

Wie 't begós...

Veur gaon truuk nao 2005. Ein aantal Zjwamer men woor 't zat det d'r te weinig te doon woor op vastelaoveszónjig in 't dörp. Mit dees ónvreje es motivasie, kwome ziej op 't idee óm get te gaon organizere oppe Zjwamer Mert.

Mit Wiek Doezen en Sjra Puts veurop waerde 't Mertsjpektakel gebaore, ónger de werktitel 't-Groot-waem-zag-d'r-det-hiej-op-vastelaoveszónjigmiddig-nieks-te-doon-is-sjpektakel. Eine get lange naam, dus äöpende op zónjig 26 fibberwarie 2006 Joeks- én hoeskapel 'Aan Dae Reem' 't eerste Zjwamer Mertsjpektakel!

En toen verder...

Naodet 't eerste jaor es zeer gesjlaagd waerde bevónje door alle betrokke partieje, waerde besjlaote óm ein vervolg te gaeve aan 't Mertsjpektakel. D'r waerde eine entoesiaste groep vriejwilligers gevormp die de kèr móste gaon trèkke.

In samewirking mit de kefees aan de Mert waerde 't Mertsjpektakel oetgebouwd toet ein festiviteit, die veur väöl vastelaovesvierders oet Zjwame en ómsjtreke vas in de agenda sjteit mit de vastelaovindj.

Vandaag de daag...

Veur moge truukkieke op 13 gesjlaagde edisies van 't Mertsjpektakel, mit 't 11-jäörig jubelejum in 2016 es hoogtepuntj! Mer eigelik is edere keer bezónjer op zien eige meneer. Jaor nao jaor kómme d'r weer meer luuj op vastelaoveszónjig nao de Mert in Zjwame, mit altied ein gevarieerd programma en ein heel gezellige sfeer.

Veur zeen dich den ouch gaer op vastelaoveszónjig 3 meert 2019!